14/9/12

Recomendacións en Radioleiros: 14 de setembro

- Infantil (nenos-as menores de 8 anos):
"Fiz, o coleccionista de medos" texto de Fina Casalderrey e ilustracións de Teresa Lima en OQO
Fiz non era coma os outros nenos: Fiz era o neno máis medorento do mundo! Así comeza este relato sobre un neno que tiña moitos medos...
Fermoso libro que nos fala do poder de superación que cada persoa debe afrontar contra os seus propios medos. Unha obra sobre os sentimentos e as emocións, cunhas atractivas e orixinais ilustracións que mereceron unha distinción do xurado do Premio Nacional de Ilustración de Portugal no ano 2011, na súa edición portuguesa.
- Mozos/as e adultos/as:
"El verano sin hombres" de Siri Hustvedt, editado por Anagrama
Mia, aos 55 anos, volveuse tola cando o seu home dixo a palabra “pausa” e tiveron que ingresala temporalmente nun hospital psiquiátrico. Despois de trinta anos casada e sen adulterios, agora el dille que precisa unha pausa no seu matrimonio, pero esta “pausa” é francesa, vinte anos máis nova que ela e traballa con el no laboratorio...
Unha novela amena, con toques de ironía e gran sentido do humor, que trata sobre esa crise que acontece nalgunhas parellas despois de levar moitos anos vivindo xuntos e sen problemas, nas que un día el decide irse con outra. Tamén fala das diferenzas, principalmente a que marca a idade.
Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.



11/9/12

A pique!: libros e pelis de naufraxios no centenario do Titanic 1912-2012

Durante 100 días (finalizará a mediados de setembro) lembramos o centenario do naufraxio do Titanic cunha exposición de libros e DVD, composta por case cen títulos, para nenos-as, xoves e adultos-as. Xunto a unha maqueta do extraordinario navío, deseñado para ser insomerxible, que fora o máis moderno e grande do seu momento, amosamos libros e películas nos que hai naufraxios, piratas, barcos, exploradores-as, e mil e unha aventuras relacionadas co mar. Visita a escolma de títulos!