20/11/15

Recomendacións en Radioleiros: 20 de novembro

 http://www.oleiros.org/web/concello-oleiros/comunicacion/radio/podcast/todo-esta-nos-libros
http://bmpg.rbgalicia.org/cgi-bin/koha/opac-detail.pl?biblionumber=115849- Infantil (a partir de 2 anos):
"Lucecús" de Pirilampo editado por Galaxia.
O grupo musical Pirilampo está formado por distintos profesionais que proceden do mundo do ensino, a música profesional e a educación musical. Voces, acordeón, piano, guitarra, frauta, baixo, percusión, batería, gaita, violonchelo, saxofón e pandeireta interpretan once temas que fan as delicias de nenos/as e maiores: O Apalpador, Os contos do padriño, O mundo do revés, Pedro Chosco, Pirilampo vai ao mercado, Teño un barco de papel, Doce meses ten o ano, A casa do Tío Nicanor, Arrolos do mar, Sol ou Os meus primeiros pasos.
Ao mesmo tempo que escoitan estas cancións poderán ir vendo as fermosas e divertidas ilustracións do libro realizadas por Federico Fernández.
Libro-disco dirixido a nenas e nenos a partir de 2 anos, pero que gusta a toda a familia, co que os máis pequenos poderán comezar a coñecer a musica tradicional galega mesturada con sonoridades modernas.

 
- Mozos-as e adultos-as:
"Morgana en Esmelle" de Begoña Caamaño, en Galaxia.
Recibiu os seguintes recoñecementos:
- Premio da Crítica Española ao mellor libro de narrativa 2012
- Premio ao mellor libro de ficción da Asociación Galega de Editores 2012
- Premio Antón Losada Diéguez 2012
- Premio da Asociación de Escritores e Escritoras en Lingua Galega ao mellor libro de narrativa 2012
Unha novela que actualiza o mito artúrico dándolle unha visión contemporánea. O seu argumento trasládonos ao famoso Mundo Artúrico e  á obra Merlín e familia de Álvaro Cunqueiro.
No castelo de Tintaxel vive o rei Garlois, a súa muller Igraine e Morgana, a filla de ambos. Nunha batalla Garlois resulta malferido, e o mago Merlín logra que Uther de Pendragón, o nobre que derrotara a Garlois, adopte a aparencia deste e deixe embarazada a Igraine.
Froito desta relación nacerá Artur...
Un libro moi interesante, cunha mirada feminista, que resalta o papel da sabia Viviana e de Morgana fronte ás pretensións de Merlín, ao mesmo tempo que presenta diversas temáticas como: a educación, o tipo de sociedade, a relixión, a liberdade sexual, a igualdade entre homes e mulleres, etc, e que fai reflexionar sobre se o fin xustifica os medios e a necesidade de asumir as consecuencias dos nosos actos.

Recomendacións feitas no programa semanal que podes ESCOITAR en "Todo, todo está nos libros", emitido en Radioleiros (101.5 FM) ás 13, 15 e 17 horas.